Executive日記——身處險境 下車施援手 鐵騎暖男護送婆婆過路

        香港人好有愛心,昨日又有明證啦!有網民喺粉嶺街頭拍攝到一單好人好事,一個拎住一袋二袋雜物嘅婆婆走咗出馬路,一個揸緊電單車嘅猛男二話不說停車,攙扶婆婆,網民形容為「鐵騎暖男」事件。

        有網民喺社交群組分享一條車cam片段,片中一個婆婆企咗喺車來車往嘅馬路旁,手執兩袋雜物,蹣跚前行,相當危險,一個唔覺意就會被車撞,喺危急之際,一名揸電單車戴頭盔男子將架車停埋一邊,落車陪伴在側,仲護送婆婆行返上行人路,仲不時彎腰同佢傾偈,好有愛啊!難怪唔少網民大讚佢係「暖男」。

  Kelly喺網上找到「暖男」阿傑,佢同小妹講,見到婆婆一度坐咗喺路邊,以為佢唔舒服,咪停咗架車埋去睇吓有咩幫到佢囉!佢形容婆婆唔算好精靈,但都唔似腦退化或者盪失路,只係無意識到行近馬路嘅危險,仲想堅持繼續前行,佢唯有慢慢陪婆婆行,好彩搵到警察幫手,帶返佢去安全地方。

  阿傑話,事發地點附近有唔少地盤,好多大型貨車出入,驚大家會睇唔到婆婆而釀成車禍,Kelly聽見佢咁話好感動。

Kelly Chu


hd