Executive日記——會展舉行賽事 演唱會留紅館 電競賽「分場」 門票賣大包

        旅發局去年舉辦首辦電競音樂節,大受歡迎,Kelly收到料,局方今年八月將呢項盛事場地一分為二,電競賽事移師會展,演唱會就留喺紅館,據聞今年電競賽事門票會賣大包,可能調低三、四成,預計吸引十萬人流!

        今年電競音樂節喺八月二十四至二十六日舉行,旅發局呢個項目嘅負責人洪忠興(Mason)同Kelly講,去年紅館同場搞電競比賽同音樂會,兩邊座位有限,演唱會得一場,而喺紅館出面嘅戶外體驗區,唔少商戶話「好天曬落雨淋」,今年決定「分場」舉辦,等大家更enjoy咁話。

  電競賽事同體驗區將移師會展舉行,而賽事增至三項,除咗去年嘅「英雄聯盟王者回歸世界邀請賽」外,仲增設《絕地求生》世界邀請賽同ZOTAC CUP MASTERS《CS:GO》盃賽全球總決賽,而第三項就係最近成為新聞話題嘅「食雞」《絕地求生》世界邀請賽。

  旅發局總幹事劉鎮漢(Anthony)話,電競比賽舉辦同期亦有香港電腦通訊節,購買電競賽事門票人士,可以免費參觀電腦通訊節。至於比賽門票價錢,Anthony話仲未定,但一定會平過去年,仲可能調低三至四成,大約有四千至六千張門票。

Kelly Chu

hd