Executive日記——港產手提冷氣機登場

  呢排氣溫上升,Kelly出街一頭大汗,紙巾用多咗,有朋友話畀小妹知,貿發局今明兩日喺會展會舉辦第十屆「創業日」,入面展示多款嶄新嘅科創產品,其中由港人設計嘅全球首款手提智能冷氣機,可以拎出街用,簡直係夏日恩物啊!

  小妹好想擁有嘅手提智能冷氣機,係由Hi-Cooler Company嘅創辦人陳家潤(見圖)研發,佢同小妹講,呢部便攜式嘅「冷氣裝置」用咗一年有多嘅時間研發,當中運用到水蒸發嘅技術,大家只要為裝置裝小小水,就可以用到㗎喇!陳家潤仲話,為咗控制風量同噪音,會分室內外唔同嘅模式,真係好細心呀!

Kelly Chu


hd