Executive日記——Kelly親眼睇到 紅毛「凶兆魚」 好Yeah

        有漁民喺塔門捕獲本港歷來第二條罕見嘅「地震魚」,好多人擔心係個凶兆,Kelly就平常心處之,反而好想親見睇吓,昨天如願,見到地震魚眼大大,頭上仲長出好多條長長嘅紅毛,真係夠晒潮!

        Kelly昨天去睇過呢條正名為皇帶魚嘅罕見深海魚,眼界大開,佢身長三點一八米,約九點五呎,最特別係頭部長出幾條長長嘅紅毛,眼大大,扁長身形呈銀白色,有一塊塊暗斑。正當小妹睇到入神,魚類專家莊棣華話,紅長毛唔係頭上嘅毛,而係長背鰭嘅一部份,仲由頭生到落魚尾。

  捉到呢條皇帶魚嘅漁民話,家中三代捕魚,都從未見過皇帶魚,即刻將佢雪藏喺大埔街市一個魚檔內,並第一時間透過漁民朋友,聯絡莊棣華,等佢來鑑別。莊棣華睇過後,大讚漁民有心,指皇帶魚保存完整,十分難得,好有研究價值。

Kelly Chu

hd