Executive日記——李柱銘娶新抱擺酒之地 美韓峰會酒店 旅遊達人大讚

        美國總統特朗普和北韓領袖金正恩鐵定下周二喺新加坡聖淘沙島嘉佩樂酒店(Capella Singapore)見面,令到呢間五星級豪華酒店舉世矚目,連入住過嘅旅遊達人都讚不絕口,話兩位領袖識揀喎!

        嘉佩樂酒店呢排頻頻登上港聞版,除咗係特金會場地,民主黨創黨主席李柱銘愛兒李祖詒(Joseph)同莎莎國際控股主席郭少明幼女郭詩雅(Kitty)將會喺「特金會」舉行兩日之後,即下周五又喺呢間酒店擺婚宴。

  呢間有名酒店,除咗客房、套房,仲有豪華別墅和莊園供客人入住,一間最普通嘅房間由三千六百港元一晚起跳,認真巴閉。小妹跟旅行家朋友項明生八卦過,佢話喺酒店啱啱開幕時入住過,覺得服務一流,房間夠晒大,泳池好靚,空間感大,完全有東南亞度假feel,大讚係千禧年後先成立嘅後起之秀。另一位知名旅行家紀曉華都同意話,酒店位置偏僻,唔喺市中心裏面,正正就係呢間酒店嘅地理「優勢」,有利保安部署,啱晒想靜靜地度假嘅品味人士喎。

Kelly Chu

hd