Executive日記——「實習老師」「插班生」都係佢 「逃學威龍」劉鳴煒 做通識臥底

        Kelly發現青年發展委員會副主席劉鳴煒近排竟然着校服返學,究竟咩事呢?原來佢係應佛教茂峰法師紀念中學校長陳志維邀請,參加校內嘅教學活動。鳴煒話,咁啱自己又想了解通識課嘅教學情況,所以就做咗一次「實習老師」同「插班生」,從教與學嘅角度了解能源發展嘅情況喇!

        鳴煒前晚喺facebook專頁分享幾張上堂相,見佢一身校服打扮,陽光十足,佢好幽默咁話自己係去學校做臥底攞料。有網民就覺得佢好似拍緊《逃學威龍3》,仲大讚三十七歲嘅佢望落「好似中學生」㖭!

  小妹問過鳴煒,佢話今次上堂主要以活動教學方式進行,老師派VR眼鏡畀同學一睹日本福島經過核電事故後嘅情況,佢覺得好充實同好享受今次「學生生活」,話除咗畀自己有機會體驗學生嘅學習同埋校園生活外,亦領略到通識科多元化嘅知識建構、技能訓練,同對於培養態度嘅意義所在。

  不過返學就梗係有功課啦,鳴煒話老師有要求做功課,所以佢落咗堂之後,就寫咗一篇關於核能發展嘅文章,仲好準時交功課㖭!佢咁忙都咁勤力,真係好抵讚呀!

Kelly Chu

hd