Executive日記——命名「香港半葉趾虎」 浸大發現香港獨有壁虎

        香港真係卧「虎」藏龍,Kelly唔係講老虎而係「壁虎」。浸會大學學者發現香港原來有一個特有品種嘅壁虎,命名為「香港半葉趾虎」(見圖),見佢爬得快又高,真係可以代表香港人努力向上嘅精神。

        浸大生物系講師宋亦希話,香港半葉趾虎係全港唯一一種半葉趾虎,身長唔超過八厘米,同時係全港最細嘅壁虎品種,指及趾構造跟其他壁虎好唔同,皮瓣分裂,第一指無爪,背上近尾巴基部帶橙色花紋,尾巴仲有深淺色橫間,好得意,全球只有香港見得到。

  想一睹佢真身,宋博士推介大家去港島嘅薄扶林郊野公園、香港仔郊野公園、蒲台島和石鼓洲行下山,或者會見到佢哋蹤影。由於呢種小壁虎主要喺樹上棲息,同家居壁虎不同,大家唔多機會喺屋企見得佢哋嘅。

  宋博士仲話對於今次命名感到非常興奮,認為反映出郊野公園對生物多樣性嘅重要,又希望當局加強保育。小妹都認同每種生物都好珍貴,特別係香港獨有品種,更加要好好保護和欣賞佢哋!

Kelly Chu


hd