Executive日記——迪士尼11月Fun Run 鐵人拖埋妻女跑3K

  迪士尼樂園好奇妙,甫踏進去,大人細路都好開心!但你有無諗過,可以喺入面盡情穿梭奔跑呢?Kelly知道,一年一度、獨一無二嘅香港迪士尼樂園10K Weekend跑步體驗,將於十一月初載譽歸來,歡迎一家大細齊齊報名參賽,跑跑吓一班迪士尼老友仲會隨時現身打氣,好吸引啊!

  呢個10K Weekend跑步體驗將會喺迪士尼樂園度假區內進行,入面空氣清新、環境優美,結合運動同迪士尼元素,充滿「Fun run」味道,啱晒一家大細參與!連首位榮獲「馬拉松大滿貫」嘅港人盧俊賢(Steve)嚟緊都準備帶埋太太同三歲囡囡參與當中嘅3K賽事!

  Steve同Kelly分享,話自己平時玩開嘅極地運動,比一般運動訓練要求更刻苦、訓練時間更長,令佢同家人相處嘅時間少咗好多!

  所以希望想透過跑步,增加親子互動嘅機會,培養小朋友耐性同毅力,更加體會吓爸爸平日訓練同比賽心情嘅感受喎!佢話,佢哋一家人都好鍾意迪士尼人物同故事,好似佢自己就最欣賞超人特攻隊中嘅「超能先生」同「彈力女超人」,可以擁有超能力對抗壞人;太太就鍾意史迪仔;囡囡自細亦由米奇米妮嘅故事陪伴成長,所以相信嚟緊一定好好玩!

Kelly Chu

hd