Executive日記——曲折坑道變成「Hope」 勵志漫畫為泰少足送上希望

  泰國被困山洞超過兩周嘅十三名少年足球隊成員同教練,前日起陸續被救出,好消息振奮人心,Kelly同唔少人都好感動,網上衍生咗唔少漫畫,好多有創意得嚟,相當感人。

  泰國少年足球隊事件全球矚目,唔少相關漫畫喺網上出現,其中一張畫上救援人員穿過山洞救人嘅畫面,最令Kelly感動,當中將洞內九曲十三彎嘅路繪畫成英文Hope(希望)一詞,盡顯大家現時嘅心情;另一張救援人員帶住世界盃獎盃,送畀被困嘅多位未來足球新星,仲寫上:「世界已經搵到最勇敢同令人鼓舞嘅足球隊」;更有人留言話希望呢班「足球小將」努力練波,將來可以泰國國家隊名義,真正打入世界盃,睇到Kelly眼濕濕。

  另外,美國總統特朗普亦特登走出來評論呢件救援大事,佢昨日喺社交網站出post話正同泰國政府合作,齊齊諗計點幫所有人脫離險境。

Kelly Chu


hd