Executive日記——高鐵筍工 車廂服務員月薪萬八

  廣深港高鐵香港段預計九月就會通車,嚟緊大家北上愈來愈方便之餘,更造就唔少就業機會,好似Kelly最近發現,勞工處出現高鐵外判服務商嘅招聘廣告,聘請多個職位,其中以兼職車廂服務員月薪最高,每月工作一百六十八個鐘,月薪居然有萬八蚊!

  兼職車廂服務員主要負責車廂服務工作、解答乘客查詢同控制人流,要求唔算特別高,只須具備中五程度同一年工作經驗,加埋兩文三語就ok,但月薪居然去到萬八蚊,平均時薪比港鐵現有五十九蚊嘅兼職車站助理高近一倍!西九龍高鐵站外圍保安亦有萬七蚊月薪,同樣吸引。合眾人事顧問有限公司總經理蘇偉忠同Kelly講,雖然香港相對上比較少車廂服務員,但以中五程度等要求嚟講,月薪都幾吸引!至於外圍保安,亦相比起現時普遍萬四、五蚊嘅住宅保安高,都算係筍工一種,有需要嘅朋友記住參考吓喇!

Kelly Chu


hd