Executive日記——剛剛造好 銅鑼由小變大 小米敲巨鑼上市 港交所「大細超」?

  昨日股壇迎嚟首間以同股不同權形式來港上市嘅小米集團!焦點新股上市,連敲個「鑼」都大過人,比起平時大幾倍!原來銅鑼係新整好,只係咁啱得咁橋啫,唔係為小米而設㗎!

  小米集團昨日首日掛牌,集團高層依照習俗,敲響港交所嘅上市銅鑼,認真恭喜晒!不過Kelly聽落,點解小米董事長雷軍敲起銅鑼上嚟特別有氣勢?原來係港交所預備咗個新鑼,直徑有成一點八米,重成二百公斤,比以前嗰個足足大咗八成,勁啊!有網民就說笑話,小米可以用大鑼,人哋就細鑼,係「大細超」喎。

  其實係誤會至真,港交所發言人同Kelly講,昨日用嘅新銅鑼的確比以前大,但原定係喺今年年初香港金融博物館啟動時首用,只可惜當時趕唔切完成,咁啱最近完工,終於用得,咪變咗由小米敲出第一下大鑼聲囉!佢重申只係巧合,絕對唔係偏袒。Kelly就覺得,新銅鑼可以留到首家同股不同權企業上市時用,都幾有意義!

  另外,小米昨日掛牌後股價潛水,收報比招股價低咗少少,短線亦被看淡,但都無阻董事長雷軍同一眾員工心情,齊齊selfie留念,仲話成績已經比預期好,形容成功上市只係小米故事第一章嘅總結,第二章會更加華麗絢爛咁話,好有自信,Kelly一於畀個like佢。

Kelly Chu


hd