Executive日記——《星島》球星海報夠神 貼中英法齊晉級

        世界盃四強之戰昨日深夜開打,今屆連強隊巴西都出局,令唔少人跌破眼鏡,不過《星島》眼光獨到,連續以唔同方式估中出線隊伍,好似最近兩星期就分別送出法國同英格蘭靚仔球星嘅海報,兩隊都殺入四強,而旗下網媒「Popnews」又搵嚟藝人阿Bob林盛斌貼中比利時同克羅地亞贏波,真係好勁啊!

        世界盃打得如火如荼,比利時、法國、英格蘭同克羅地亞晉身四強,好多人都跌眼鏡!Kelly發現,喺啲咁難估嘅情況下,居然「買乜中乜」,仲估中晒四強!好似《星島》逢周日送出嘅球星粉紙海報咁,喺上星期揀中法國隊球星嚟送,今個星期更加係英格蘭神射手卡尼!Kelly問返《星島》班小編,佢哋話揀個時未知佢哋咁勇打入四強,純粹「顏值至上」揀靚仔,點知全中。

  唔止咁,《星島》旗下網媒「Popnews」同樣預言力爆燈,連續兩次搵來藝人阿Bob林盛斌喺賽前分析估賽果,又真係俾佢講中比利時同克羅地亞贏波!阿Bob喺節目當中仲話,自己平時唔多時間睇波,不過早喺街機年代嘅足球機已經預言克羅地亞出球最勁,所以深信克羅地亞對地膽俄羅斯一定會贏!咁準,睇嚟絕對可以接替「八爪魚保羅」,做「預言Bob」喇!

Kelly Chu

hd