Executive日記——香港電競節勁犀利 總獎金200萬爆晒燈

  電競音樂節又嚟喇!由旅發局主辦嘅「工銀亞洲香港電競音樂節」,下月二十四至二十六日喺會展開打,上演三場國際頂級電競賽事,獎金更創下香港電競史上新高!場內仲有體驗專區,展出多款最新嘅電競遊戲及產品。Kelly知道今年仲有票務優惠,令入場人士有更豐富嘅體驗!

  旅發局主席林建岳話,上年首辦電競節成功為香港帶來超過一點五億元嘅宣傳效益,同時吸引逾七百四十萬人次於網上觀看電競賽事直播,好犀利,帶動咗電競熱潮!所以今年活動規模會更加大,內容亦會更豐富,令人好期待呀!

  今年有兩項全新賽事——其中「ZOTAC CUP MASTERS《CS:GO》盃賽全球總決賽2018」勝出隊伍,可獲總獎金超過二百萬港元,創香港電競史上新高!而「香港《絕地求生》世界邀請賽」嘅獎金超過一百萬港元,金額係《絕地求生》本港賽事中歷來最高!

  電競音樂節及各場電競賽事門票下周一起,喺「快達票」公開發售,票價分為二百五十元、一百二十元及五十元。「體驗專區」入場費則為十元。另外,持有電腦通訊節或電競賽事門票嘅人士,可於同日免費進入體驗專區。有興趣嘅朋友記得mark定日子買飛!

Kelly Chu


hd