Executive日記——方健儀:差啲嚇親 搞笑小方包濕紙巾 似足避孕套

        餐具不環保,近日成為話題,繼環保團體發起「走膠管」運動後,Kelly朋友外出用膳,發現餐廳、酒樓潮興一款密封包裝嘅小形方塊濕紙巾,超初唔覺意,仲以為係避孕套O添,真搞笑,好似前電視新聞主播方健儀(Akina)就試過喺一間日式食肆見到一小方包「003」濕紙巾,仲以為係超薄型避孕套,差啲嚇親咁話喎!

        Akina同Kelly分享,佢與友人去一間觀塘日式食肆食飯,枱面上放咗一包疑似避孕套嘅物件,當時嚇到個心「離咗一離」,原來係小方形濕紙巾。Akina話,香港人真係「創意澎湃」,係市場營銷手法,「吸引到唔少人影相,可以一傳十,十傳百!」

  其他朋友亦有類似遭遇,發現好多食肆都採用呢種小方形濕紙巾,有餐廳仲印上別具心思嘅字眼,如「約會食飯嗎?」。Kelly見到一啲設計係金屬封包,閃閃哋,真係好似避孕套款式,睇真啲先見到下方註明「專業消毒濕紙巾」,如果放喺銀包入內,真係好容易俾人誤會㗎。

  環保觸覺義務總幹事譚凱邦就提醒大家,好多濕紙巾用嘅浸液都來源不明,可能會令人皮膚敏感,出現紅腫,建議大家「可免則免!」佢話,為咗令濕紙巾無咁容易爛掉,好多生產商會用上人造塑膠同「不織布料」(nonwoven fabric),唔容易被大自然分解,建議大家洗手或者噴酒精消毒,盡量唔好用呢啲不環保嘅小濕紙巾。

Kelly Chu


hd