Executive日記——「環保再斟」膠樽量激減八成  茶水亭走膠 發哥讚好

        就算勁熱,Kelly都鍾意往山上行,尋求不一樣嘅高度嘛,尤其經常去吓大帽山,探吓茶水亭蓮姐,近排佢響應「走膠」,推出「環保再斟」措施,據聞成效唔錯,近兩個星期以來收到水膠樽量大減八成,讚好嘅點止得Kelly一個啊,連親民嘅天王巨星周潤發「發哥」都讚好。

        小妹喺社交平台見到,蓮姐上載佢同發哥嘅合照,發哥喺「環保再斟」水缸豎起隻大姆指,畀個Like。而個帖文仲寫住:「發哥都讚」、「今早發哥都身體力行」,呼籲大家一齊支持「環保再斟,自備水樽」。

  蓮姐有心「走膠」,小妹梗喺大力支持啦。不過,有網民留言指,「環保再斟」曾被人投訴,留言話「上星期經過蓮姐度,佢話有人投訴食環署拒畀山水人哋飲」,又話「咁樣俾人裝水唔衞生」。不過,有網民力撐蓮姐,話「政府飲水機」都一樣,又有人話好想「捕獲發哥」。計小妹話,既然發哥都讚,就冇藉口唔支持啦!

Kelly Chu

hd