Executive日記——香港居住環境似第三世界 胡應湘誇口填海造地只需四年

        樓價貴到人都癲!智庫組織團結香港基金昨天建議推行「強化東大嶼都會」,大規模填海造地。合和實業董事會主席胡應湘昨天出席基金會嘅發佈會,佢就公開「吹雞」,希望盡快落實填海計劃,呼籲社會各界「為下一代着想,而唔係為蜥蜴着想。」

        團結香港基金昨日發表成立三年半以嚟最大型嘅研究報告,建議港府喺大嶼山同港島之間打造一個可以容納百萬人居住嘅人工島,長遠滿足香港未來整體發展需要。有「亞洲基建之父」之稱的合和主席胡應湘喺基金會上致辭時就話:「香港人嘅收入達世界一流水平,但居住環境好似喺第三世界!」對已經買咗樓嘅人嚟講雖然無影響,但大家有責任為下一代「做啲事」。

  對於填海造地,坊間一直有反對嘅聲音。胡應湘就話,填海計劃係開始,「唔開始就永遠都無法解決問題!」佢亦話,由填海到建屋入伙唔使十幾年咁耐,只要大家肯「吹雞」,即時落實填海,最快四十八個月、最慢六十個月就可以填出土地嚟用,佢語重心長咁話,希望大家為下一代着想啦!

Kelly Chu

hd