Executive日記——P圖改變審美觀 小心自拍誘發心理病

  Kelly平時鍾意用美圖App自拍,呃吓Like,最近睇到新聞話美國有研究指成日P圖,會改變審美觀,仲會誘發心理問題!研究話以前喺明星先P相,但喺呢個時代美顏照充斥社交媒體,容易誘發一種心理病叫軀體變形障礙,患者成日不合理地覺得自己唔靚,成日想改變自己,例如會整容整到上癮、日日擺P圖上網但就唔敢用真身見人等,聽到小妹都驚自己有冇問題。

  小妹問過精神專科醫生丁鍚全醫生,佢話軀體變形障礙,其實有啲似厭食症,患者永遠覺得對自己外表唔滿意,外國好多整形科醫生已經發現唔同嘅案例。丁醫生仲話,呢種心理病難靠藥物控制同難根治,嚴重會致抑鬱同自殺!聽落好恐怖咁,好彩丁醫生都醒咗啲貼士過小妹,提醒我哋人無完美,咁就可以預防患上呢種心理病啦!

Kelly Chu


hd