Executive日記——新推瀕危動物款式 「臉堅尼」再進化 搞笑得嚟助保育

        已經立秋,天氣依然熱辣辣,最啱去海邊享受陽光與海灘。Kelly同每一位女士嘅夢想都一樣,就係曬極都唔黑!普通人會搽吓太陽油、擔吓遮,但近年由大媽發明嘅防曬神器「臉堅尼」,大行其道,其中「臉堅尼」發源地嘅青島近日推出新款式,加入瀕臨絕種嘅動物,話要支持保育,搞笑得嚟又有意思。

「臉堅尼」嘅發明人,係青島嘅大媽張式範。有一次佢朋友游水被水母刺傷,佢靈機一觸,以潛水帽為原型,改裝成「臉堅尼」保護個頭,仲防曬黑塊臉,喺一二年推出之後,大受歡迎,變成中國近代大發明之一!O依家「堅尼臉」已經進化至第六代,推出咗大公雞、瀕臨絕種嘅動物、老虎等臉譜等設計主題。

  近日青島舉辦「臉堅尼」騷,有大媽搖身一變,喺海灘嚟個金雞報曉,仲有人試穿十大瀕臨滅絕嘅動物嘅「堅尼臉」,其中一個穿海龜造型嘅模特大叔仲話:「現在很多動物已滅絕,人類有責任保護這些動物。」

  新款「臉堅尼」又大玩中國元素,有「花旦」、「孫悟空」同「關公」造型,雖然Kelly覺得有少少似紙紮公仔,夜晚見到都咪話唔驚!呢幾款「臉堅尼」喺淘寶售三十二蚊人民幣,共有五千次成交,相當受歡迎,仲有大媽買家讚不絕口啊!

Kelly Chu

hd