Executive日記——放入遮身 吸走雨水 馬會撐「走膠」新乾傘機登場

  呢排頻頻落雨,周末又話打大風,好多處所嘅大門口都擺放長短膠套,等大家套住把傘,防雨水周圍滴濕晒,膠套用一次就掉,咁做與最近興起嘅「走膠」潮流相違背,但香港賽馬會就好有心思,喺馬會會所門口擺放一個新式雨傘除水機,形狀幾趣致,只要將把遮插入去,唔使一陣間就吸光雨水,有型地「走膠」撐環保,真係抵讚。

  最近雨傘膠套嘅環保問題引起關注,有環保團體建議徵收雨傘膠套費,惹嚟爭議。其實唔用膠套,都有計除去遮上嘅雨水。香港賽馬會就喺會所門口放置兩部雨傘除水機,其中一部白色,好似一個洗手盥,但中間好似𠝹開幾條坑,坑邊舖滿海綿,只要將把遮放入去,上下移動三至四次,啲海綿就會吸走遮上嘅水滴,想效果好啲,反方向再做一次就得。小妹見到機械上有日文字,應該係日本嘅創意產品。

  另一部雨傘除水機,由兩塊不銹鋼板組成,中間有吸水纖維,只要將濕咗嘅遮喺中間掃過去搖幾下,纖維就會吸走啲水,但大家要留意,雨傘除水機嘅目的係要令雨傘唔再滴水,而唔係完全乾透,所以用完機器把遮仲係濕濕哋係正常㗎!

  馬會老友同小妹講,雨傘除水機仲係試驗階段,會放喺馬會不同處所,俾市民試用,如果反應又好嘅話,就會增設多幾部,Kelly俾個大LIKE。

Kelly Chu


hd