Executive日記——營養師教路:沖番石榴葉消滯 瑪院貼心圖鑑 幫你計住熱量食月餅

  中秋佳節,人人食月餅應節,Kelly淺嚐即止,皆因怕肥。瑪麗醫院營養部公開一張月餅圖鑑,詳列各款月餅嘅熱量、糖同埋脂肪資料,提醒市民小心份量,真係好細心!有營養師提醒市民,盡量唔好喺夜晚食月餅,想消滯,可以加啲番石榴葉沖綠茶飲喎。

  今年流心奶黃月餅再次掀起搶購熱潮,根據瑪麗醫院營養部嘅月餅圖鑑分析,原來食一個迷你奶黃月餅(四十五克),相等於攝入一百七十二卡路里,即約一碗飯、二茶匙油、二茶匙糖,小妹聽見都飽。營養師李杏榆(Annie)建議大家,最好一日只食半個就夠。

  最高卡路里嘅莫過於傳統雙黃白蓮蓉月餅喇,傳統嘅雙黃蓮蓉月餅每個(約一百八十五克)含七百六十卡路里,即約三碗半飯嘅熱量。Annie就建議每次最多食四分一個。

  今年都興榴槤冰皮月餅,但榴槤本身係高熱量生果,所以榴槤冰皮月餅嘅卡路里都比其他冰皮月餅高。瑪麗醫院營養部話,一個六十克嘅迷你榴槤冰皮月餅有一百五十六卡路里。想食冰皮月餅食得健康啲,可以揀綠豆蓉或者官燕餡嘅,熱量同脂肪都比較低。

切忌夜晚進食

  Annie話,月餅都有一定嘅熱量、糖同埋脂肪,建議大家盡量唔好喺夜晚食,同埋食完唔好坐喺度,可以去散下步,消耗下啲熱量。而一啲高糖、高膽固醇同患有癌症嘅人更加要食少啲。

  食完月餅想消滯,Annie建議飲綠茶,例如香片、烏龍,最好加啲番石榴葉,因為番石榴葉有助穩定血糖。

Kelly Chu


hd