Executive日記——高鐵通車紀念郵票 專家話難升值炒唔起

  高鐵呢個月二十三日正式通車,香港郵政宣佈發行一套四枚、以高鐵香港段為題嘅特別版郵票,印有中港兩地嘅文化同地標圖案,下周一就推出喇!Kelly會買嚟留念,但想炒作嘅朋友,就唔建議啦,因為專家話炒郵票熱潮已過。

  香港郵政喺九月十七日正式發售以「廣深港高速鐵路香港段」為題嘅特別郵票,一套四枚。呢套郵票採用連票設計,形象鮮明,以高鐵列車嘅奪目色彩及流線設計貫串四枚郵票,由左至右分別展示廣州(二元)、深圳(三元七角)和香港(四元九角及五元)嘅特色,郵票上嘅列車印有代表廣、深、港三地嘅文化同地標圖案,例如香港就印有中銀大廈、中華白海豚及地道小食等。列車中段更化成兩隻拖住嘅手,象徵中港兩地嘅交流同融合。

  整套郵票售價係十九元四角,市民每次排隊限買五封。

  香港郵政高級經理(集郵推廣)李振宇話,今次預訂情況「非常之熱烈」,提醒市民由於颱風「山竹」周末接近本港,可能會影響郵票嘅銷售安排,想集郵嘅市民記得留意香港郵政公布嘅惡劣天氣安排喇!集郵專家何明新對Kelly話,炒賣郵票嘅熱潮已經過咗,所以即使高鐵郵票會吸引中港集郵人士選購,但應該唔會點升值,大家都係儲起慢慢欣賞啦!

Kelly Chu


hd