Executive日記——鍾意香港自認係香港人 「鬼佬」唱作廣東歌「What Up HK」

        Kelly昨天聽到一首廣東話嘅歌,但唱者竟然係三個外國人!佢哋自稱「鬼佬」,作咗首「What Up HK」,啲歌詞好貼地,例如「識少少扮代表」,再搵佢哋資料,先知佢哋曾經喺香港住過,好鍾意香港嘅文化,仲自認係香港人嚟,表達對香港嘅掛念喎。

        兩個美國男孩艾正斌、田承忠早前喺佢哋自創嘅網上平台「The Gwai Lou Show」,並上載一首歌「What Up HK」,內容係講佢哋對於香港嘅睇法同掛念。原來佢哋喺香港住過兩年,識聽識講少少廣東話,而佢哋好鍾意及尊重香港嘅文化,八年前開始拍片講廣東話。

  「What Up HK」嘅歌詞都幾貼地,例如:「我哋喺香港唔係住得好耐,所以我哋唔可以講得好快,我哋識少少扮代表,你哋可能覺得我哋好搞笑」、「我都唔係咁靚仔,好似Daniel Wu(吳彥祖)」、「香港音樂?最好係張敬軒」。

  佢哋甚至當正自己係香港人,其中一句歌詞話「如果你可以睇得穿我內心,你就更加會睇到,我其實都係香港人」,Kelly完全感受到佢哋對香港嘅喜愛。有網民都忍唔住留言話「多謝咁鍾意香港同埋推動廣東話及歌」,不過都有人話唔係好明佢哋唱咩,唔知大家又聽得明幾多呢?

Kelly Chu

hd