Executive日記——工廈螢光色粉防漏測試 城門河驟變綠色嚇親街坊

  詩人聞一多《死水》中「讓死水酵成一溝綠酒」可以用嚟形容城門河?昨日不少火炭居民都見到城門河水變成螢光綠色,相當驚訝,紛紛問係咪有非法排污,有心水清嘅網民就話係色粉試水。環保署回覆Kelly話係有工業大廈用螢光色粉進行防漏測試,不含有毒物質,大家唔使驚。

  昨日有網民喺facebook專頁「香港突發事故報料區」上載四張圖片,顯示城門河火炭段嘅河水變晒螢光綠色,十足十詩人聞一多《死水》中所講「這是一溝絕望的死水」咁呀。

不含毒物可降解

  唔少人都嚇一大跳,話「肯定又有好多魚死」、「知不知乜嘢叫公德」,不過都有網民心水清,話係「色粉試水啫」,唔使「大驚小怪」。

  Kelly問咗環保署,佢話螢光綠色嘅水係源自火炭一工業大廈,用螢光色粉進行天台面防漏測試。 調查後初步證實嗰啲螢光色粉不含有毒物質及可生物降解,而相關水域嘅螢光顏色喺昨日傍晚時分已逐漸消散。

  而為確認水質情況,佢哋已抽取水樣本作進一步化驗及要求有關承辦商提供螢光色粉嘅資料。大家可以鬆一口氣啦!

Kelly Chu


hd