Executive日記—— 啃82碗餐蛋麵? 茶餐廳爆笑收據

        昨天網上瘋傳一張「奇」相,係由深水埗,一間茶餐廳發出嘅收據,上面竟然寫上有人食咗八十二碗餐蛋麵!埋單成三千幾蚊,好誇張。小妹打去呢間茶餐廳問負責人發生乜事?原來係新同事「擺烏龍」打錯單,當時即刻糾正,佢希望客人體諒,唔好把芝麻綠豆嘅小事都擺上網咁話!

        Kelly喺社交平台見到呢張「趣爆」茶餐廳收據,上面印住有人食咗八十二碗餐肉熟蛋公仔麵!加一杯飲品,盛惠三千零三十幾蚊,諗起個客食到肚都會凸咗出嚟。小妹打電話去呢間茶餐廳八卦吓,係咪有「大胃王」出沒,原來係誤會一場。

  茶餐廳負責人黃小姐同小妹講,當日有一個新手樓面返工,唔小心打錯張單,其他同事發現,即刻收番,並作更正,再三澄清無收多客人錢,唔明點解小小事都擺上網!Kelly聽完都覺得「生意難做」!希望大家唔好誤會啦!件事引起唔少網民關注,更加有「眼利」網民仲留意到八十二碗餐蛋麵配一杯飲品,好趣咁留言話:「八十二個餐蛋麵得一杯嘢飲實鯁死。」笑咗!

Kelly Chu

hd