Executive日記——美酒佳餚巡禮俊男美女現身 陳豪沖咖啡好型 超蓮整刈包吸睛

        今年嘅美酒佳餚巡禮唔單止有美酒佳餚,仲有俊男美女!Kelly昨日去試食會,高大威猛嘅陳豪即席親民煮咖啡畀小妹飲,而賭王千金何超蓮都帶來台灣刈包,食到個個讚不絕口。

        昨日陳豪着一身smart casual,超蓮著白色裇衫現身美酒佳餚巡禮試食會,俊男配美女相當養眼。陳豪仲即席沖咖啡,最特別嘅係佢唔用咖啡濾紙,反而用濾布,沖嘅時候就好似沖奶茶咁,飲落口感好豐富,厚身得嚟又滑順,Kelly大讚!佢哋嘅攤位以秋天嘅感覺為主題,提供手沖咖啡、濃縮咖啡同牛奶咖啡等幾款。而超蓮就特登為今次活動整咗傳統台灣食品刈包,連玖五牛肉麵門市都冇㗎!Kelly試食完覺得相當好食,口感好爽、好軟,相信到時一定大排長龍。

  Kelly偷偷哋話你哋知,陳豪同超蓮喺十月二十五至二十八日都會現身中環海濱活動空間及添馬公園嘅美酒佳餚巡禮,大家到時可以即管碰碰運氣。

Kelly Chu

hd