Executive日記——大狀:唔係喺屋企就大晒 喺屋企食煙都唔得?

        Kelly喺社交媒體見到一封「奇特」嘅警告信,引起好多網民熱議,封信內容係有人投訴鄰居吸煙,導致管業處向吸煙者作出勸喻,有網民就唔明喺自己屋企吸煙,點解唔得,又點騷擾到鄰居呢?小妹問過大狀,原來唔係喺屋企就大晒,做乜都得㗎!

        Kelly喺社交平台見到大角咀凱帆軒管理公司發出嘅一封警告信,內信指收到住戶投訴有附近單位嘅人吸煙,封信引發好多網民熱議!有網民批評投訴唔合理,反問話點解喺自己屋企食煙都唔得,仲諷刺話可能遲啲連去廁所太臭都比人投訴;但亦有網民就話食煙唔係唔可以,滋擾到鄰居更加唔啱,「如果唔開窗唔開門食,無話唔俾嘅。但好多人都係噴出去窗外」。

  小妹打過去物業管理處問過,一名日間保安主任話,有兩個户主投訴過一位鄰居成日食煙,煙霧滲透咗出走廊及飄入其他單位,保安上門了解時,亦覺走廊確「煙霧瀰漫」。

  大律師陸偉雄亦對小妹話,住宅係私人地方,唔屬於禁止吸煙區,但如果發出嘅煙霧或味道滋擾到鄰居,鄰居可以向法庭申請「禁制令」,而管理公司可以根據「大廈公契」去約束作出滋擾行為嘅住戶。Kelly覺得香港地少人多,大家屋內做乜嘢都好,要顧吓左右嘅感受先得。

Kelly Chu

hd