Executive日記——甜笑冧爆承認婚訊 「魔童」 再婚娶總商會靚女總裁

        有「魔童」之稱王維基,同香港總商會總裁袁莎妮終於拉埋天窗,成為政商界佳話。向來低調處理感情生活嘅王維基,早前俾翁靜晶爆出同袁莎妮拍拖,昨天佢再婚消息一出,即刻獲得好大關注,王維基回覆傳媒時就直認不諱,話「係呀。多謝關心」仲加一個微笑emoji,個款好冧咁。而袁莎妮回應:「多謝大家關心。」Kelly恭喜佢哋!

        王維基前年為咗出戰立法會選舉,驚感情生活成傳媒嘅「黑材料」,自己大爆「正處理屋企事」,暗示自己同結婚二十多年、共同育有一子一女嘅太太唐靄玲會分開。而政商界一直傳佢同前財政司司長唐英年嘅政務助理袁莎妮拍拖,有人見到兩個經常撐枱腳食日本菜同食糖水,又孖公仔咁出席官商場合。

入紙註冊引爆婚訊

  上年四月前財政司司長曾俊華開生日派對,翁靜晶喺facebook上載同袁莎妮及唐英年太太郭妤淺嘅合照個陣,留言大爆袁莎妮係「王維基的女朋友Shirley」,關係再次曝光!

  現年五十六歲嘅王維基,於本月八日入紙登記同四十八歲嘅袁莎妮結婚,王維基係香港電視網路有限公司董事會主席、香港寬頻創辦人,相信大家都好熟悉;袁莎妮喺英國牛津大學一級榮譽畢業,曾係政務官,曾任唐英年嘅政務助理、有唐英年「愛將」之稱,亦係現任香港總商會總裁,兩個人都活躍於商政壇!袁莎妮笑容甜美,難怪俘虜到「魔童」嘅心啦!Kelly真係恭喜晒!

Kelly Chu

hd