Executive日記——祝天王12月演唱會成功惹笑聲 華仔撐填海捱轟 林鄭出言力挺

        特首林鄭月娥舉行《施政報告》記者會,估唔到咁嚴肅嘅場合,竟然與民間特首劉德華扯上關係,事關林太睇過劉德華為團結香港基金挺填海嘅短片擔任旁白,話華仔所用嘅字眼,同《施政報告》好相似,更加為華仔俾網民人身攻擊抱不平!最後仲預祝劉德華十二月演唱會成功,引起現場記者哄笑。

        Kelly昨日睇《施政報告》之後嘅記者會,林鄭除咗解釋重要政策之外,仲透露自己「比社會大眾早一兩日」睇過團結香港基金製作嘅「東大嶼都會」影片,驚訝短片嘅字眼同概念與《施政報告》好相似,例如大家用咗「希望」、「前行」等字眼,佢再三強調同團結基金「無夾過」。至於點解咁心有靈犀?佢笑稱:「因為我同華仔生長喺同一個年代,(自己)應該係大佢幾年」,又話「留意過華仔嘅出身」都同佢一樣,來自基層,喺呢個年紀嘅人都想「關顧下一代」,意指公眾應支持填海,先至能夠覓地建屋。

  佢又為劉德華抱不平,話華仔條短片出咗之後,遭網民人身攻擊,「有啲侮辱佢啦」,「我覺得非常之唔公道,我喺呢度表示,對於劉先生能夠勇於表達佢嘅意見,表示敬佩」,更加「預祝佢嚟緊十二月嘅演唱會成功。」林鄭咁撐華仔,唔知林鄭會唔會去華仔演唱會捧場呢?

Kelly Chu

hd