Executive日記——填詞人發起人工島命名大賽 網民搞笑「島」名笑死人!

        林鄭最新一份《施政報告》提出「明日大嶼」計劃,建議填海興建人工島,惹來熱議。填詞人梁柏堅就喺Facebbok專頁上搞「人工島命名大賽」,拋磚引玉,先提出「敗家島」吸引眼球,仲有「技術性擊島」、「又被佢陰島」等等,激發網民發揮創意,有人拋出「慘不忍島」、「成副身家攞去島」,笑到Kelly肚痛!

        梁柏堅先喺「人工島命名大賽」中提出二十三個方案,包括「款撥唔島」、「當睇唔島」、「貴到暈島」、「下一個福島」、「兵敗嶼山島」、「斬手指戒島」、「政府永遠聽唔島」、「也會怕有一天會跌島」等等,好好笑。佢仲喺帖文標籤「地球暖化」、「水位上升」、「颱風越來越多」、「向東南嘅會變杏花邨」,反映佢對人工島同天氣變化之間嘅擔憂。

  另一方面,網民都繼續發揮創意,提出多個「島」名:「起到都住唔島」、「你睇我唔島」、「慘不忍島」、「無間島」、「為島而島」、「晚年潦島」、「估你唔島」、「孤島」、「金銀島」、「天王島」、「有目共島」、「成副身家攞去島」等等。Kelly睇到笑咗出聲,果然係高手在民間,唔知大家又鍾意邊個「島」名?

Kelly Chu

hd