Executive日記——特首參觀小學變配角 靚Miss「仙氣」逼人 搶晒林鄭鏡

        特首林鄭月娥發表《施政報告》,向教育界泵水,大增經常開支,多過預期,教育界人人拍掌,佢其中一項德政,係推動中小學教師仲全面學位化,贏取教師嘅歡心。林鄭上周五就去咗位於深水埗嘅英華小學,咪以為佢一定佔盡風頭,好多網民唔太關心佢出巡噃,反而將焦點放咗喺一名女老師身上,更有大批網民讚佢樣子甜美,話搶晒娥姐鏡噃。

        林鄭喺《施政報告》宣佈教育經常開支大增加四十七億元,教育界當堂冧晒。佢上個禮拜五到訪英華小學,同學校、老師同學生互動下,點知俾校方一名靚女Miss搶盡風頭。

  喺校方公佈嘅相片中,呢位Miss一頭烏黑長髮,樣子甜美,笑容殺死人,好有「仙氣」,而林鄭企喺張相嘅右手邊,變咗大配角,完全不在焦點之中!

  呢張靚女教師相昨天喺網上瘋傳,好多人轉載到各社交媒體專頁同論壇,大批網民一見伊人,立刻傾倒其石榴裙下,有人留言大讚話「好想讀返小學,俾靚女miss教」;有人話佢有少少似徐淑敏,但Kelly就覺得Miss靚好多噃。亦有網民講笑咁話:「究竟有幾多人真係留意到有林鄭月娥喺度」!今次娥姐真係意想不到,竟然輸俾一名小學女教師。

Kelly Chu


hd