Executive日記——曾是查大俠鄰居四五載 葉劉是金庸迷 最欣賞楊過令狐沖

  金庸創作嘅武俠小說,唔單止吸引大批男讀者,亦有不少女粉絲,其中新民黨主席葉劉淑儀就係佢忠實讀者。葉劉(圖)同Kelly講,佢同金庸以前係鄰居,大讚金庸學識淵博,又話自己最鍾意睇《神鵰俠侶》,最欣賞嘅角色就係楊過,同《笑傲江湖》入面嘅令狐沖。

  葉劉話自己後生時候住喺半山馬己仙峽道,金庸住喺樓下,大家做咗四、五年鄰居,佢有時落樓探吓金庸,「佢屋企好似圖書館,有好多書」,佢印象中,金庸學識淵博,同佢討論文學、歷史、書籍。佢嘅作品都貼近史實,例如《神鵰俠侶》就取材自南宋後期,同蒙古嘅歷史背景。」葉劉記得,金庸請過佢去文華酒店食飯,覺得金庸和藹可親。後來,葉劉去咗美國讀書,返香港之後又從政,兩人就好少見面。佢上年碰到金庸太太,話金庸已唔太認得人,所以冇再打攪佢。

  葉劉話,自己最鍾意金庸嘅作品,係《神鵰俠侶》,原因唔係入面可歌可泣嘅愛情故事,而係俠義精神,情節又曲折離奇。佢最鍾意嘅角色係楊過,以及《笑傲江湖》中嘅令孤沖,「佢哋都有缺點,唔係完美嘅,為人光明磊落,會行俠仗義,但又有啲不羈,違反世俗,與眾不同。」

Kelly Chu




hd