Executive日記——乘客寫低「借據」 港鐵願借錢搭車

        相信唔少人都試過唔記得帶銀包出門,或者遇到有路人話自己帶唔夠錢,問你借錢搭車嘅情況。Kelly搵到一個解決辦法!原來港鐵係會借錢畀乘客搭車㗎,不過要寫低「借據」,並要七日之內還錢。

        好多人都試過唔記得帶銀包出門,唔想喺街上問人借錢就行返屋企拎,但已經遲到,萬一遇着趕時間,真係唔知點算好。另一方面,最近有網民喺網上分享遇到「借錢黨」嘅事,有人以唔夠錢搭車為由,喺港鐵站內向乘客借錢搭車,惟網民最後見到該人角落拎出一疊二十元紙幣。其實遇到以上兩個情況,係可以向港鐵求助㗎。

  港鐵同Kelly講,港鐵一直致力為顧客提供方便及舒適嘅鐵路服務,留意到有個別顧客搭車時,身上唔夠錢購買車票,或者已經購買車票,但要臨時更改目的地,身上唔夠錢補返車票嘅差額,而佢哋又急需乘搭港鐵,港鐵本住服務顧客嘅精神,樂意提供協助。一般而言,職員會提供一張適合嘅單程車票畀顧客,等佢哋完成旅程。職員會協助顧客填寫一份表格,留低基本嘅個人資料及聯絡方法等,有關顧客喺七個工作天入面,可以到任何一個港鐵客務中心,交番港鐵代繳嘅車資或差額就可以。

  港鐵又話大部份顧客都有交番車資,萬一有人超過七日仍未繳還,佢哋就會根據顧客提供嘅地址,寄信通知佢哋。

Kelly Chu

hd