Executive日記——網紅齊跳八字腳舞! 抖音神曲《Oh Nanana》征服亞洲

  Oh nanana,Oh nanana……有玩抖音嘅讀者應該對呢段歌詞唔陌生,事關呢首歌就係最近風靡亞洲嘅《Oh Nanana》喇。Kelly聽完首歌都即刻畀佢洗咗腦,睇埋抖音上嘅網紅跳《Oh Nanana》舞都忍唔住跟住一齊八字擺動。

  最近睇抖音一定會見到好多網紅喺課室、屋企、地鐵站、街上、公園、旅遊景點等拍片,一路唱oh na na na,對腳一路八字擺動。因為呢隻《Oh Nanana》舞已經風靡全亞洲。《Oh Nanana》舞嘅亮點就係對腳跟住音樂嘅頓點,速度由慢至快咁八字擺動,加上音樂非常洗腦,成功成為抖音神曲。不過,原來抖音上嘅版本《Oh Nanana(KondZilla)》Bonde R300唔係原曲,而係remix版本嚟。

  洗腦歌有好多,點解惟獨呢首紅咗呢?原來係之前有個專門發佈日本學生趣事嘅帳號,發佈咗一段日本女學生跳呢隻舞嘅片段,片段入面嘅女學生外貌清純可人,開始時十分腼腆,後來開始適應音樂,八字擺動嘅舞跳得好流暢,上傳到抖音後引來好多人關注。隨住其他網紅紛紛翻跳《Oh Nanana》舞,令呢首歌成功突圍而出。

Kelly Chu

hd