Executive日記——集郵迷熱話 未出紀念郵票大俠即仙遊

        金庸大俠仙逝,連集郵迷都議論紛紛,原來香港郵政原定喺下月六日以金庸武俠小說人物發行一套郵票,但未發行大俠就去世,而香港郵政去年為國學大師饒宗頤發行郵票,點知半年之後,饒公就去世,有集郵迷都話,如果香港郵政想幫其他名人發行郵票嘅話,名人應該諗諗先喎。

        香港郵政《二○一八年郵品發行表及簡介》介紹,計劃喺今年十二月六日,以金庸武俠小說人物為主題發行郵票,包括《射鵰英雄傳》中嘅郭靖、黃蓉,《笑傲江湖》中嘅令孤沖、任盈盈,《神鵰俠侶》嘅楊過、小龍女等。但呢套郵票尚未發行,金庸就喺上月三十日去世,享年九十四歲。集郵迷話,大俠等唔到,真可惜。

  另外,上年九月五日,香港郵政發行咗一套以饒宗頤教授嘅畫作及書法為主題嘅特別版郵票,包括有《黃海虬松圖》、《九松羅漢》、《閒中有富貴 壽外更康寧》、《澤潤四方》等等,郵票發行後數月後,饒公就係今年二月六日逝世,終年一百歲。

  一班集郵愛好者留意到香港郵政今年嘅「神燈」傾向之後,紛紛表示香港郵政都幾「黑」,有人話:「如果我係名人,香港郵政話想幫我整套郵票嘅話,都係婉拒好啲!」

Kelly Chu


hd