Executive日記——「任何仁」教人防火急救 消防處「吉祥物」拍羅蘭姐好搞笑

        政府部門,一向呆板,但消防處令人另眼相看,處方為咗提高公眾嘅應急意識,發揮創意,塑造咗一個消防處「吉祥物」,佢叫「任何仁」,全身穿上藍色緊身衣,加一條黑色超人短褲,教人如何防火同急救,佢又同羅蘭姐拍陰森短片,幾吸睛㗎。但有網民就笑話,「任何仁」造型搞笑,反建議消防處搵幾個肌肉男做「吉祥物」更殺食咁話喎。

        消防處宣佈推出吉祥物「任何仁」,推廣應急知識,佢着住藍色緊身衣,由頭笠到尾,加一條黑色短褲,取名「任何仁」,意指任何人都可以救人,佢唔單止急救知識豐富,又識rap識跳舞,仲孖羅蘭姐同鄭萃雯一齊rap「CPR AED口訣歌詞」:「左手、右手、直手、擺係心口。深度,深度,5cm嘅深度。速度、速度、一秒兩下嘅速度。唔好俾佢停呀…」條片都幾陰森嘅,啱晒羅蘭姐嘅形象。

  不過,有網民笑指「任何人」形象「騎呢」,認為搵幾個大隻靚仔消防員做代言人更好。Kelly喺網上搵過,台灣、澳洲、法國、美國等消防部門都搵大隻猛男做代言人,例如每年由佢哋show肌肉印年曆,話比「任何仁」更加養眼,唔知讀者們同唔同意呢?

Kelly Chu

hd