Executive日記——《頭條日報》首次舉行場面墟冚 「冬遊嘉年華」爭住同熊本熊打卡

        聖誕節係Kelly最鍾意嘅節日,係時候準備去旅行玩番轉,《頭條日報》喺剛過去嘅周末舉辦「冬遊嘉年華2018」, 有十八間旅行社參與,好多人捧場,場面墟冚。當日除咗可向各旅行社索取最新嘅旅游資訊外,仲玩吓遊戲換禮品,人人開心,Kelly仲見到至愛嘅熊本熊,大家爭住同佢打卡留念!

        啱啱過去嘅星期六、日,《頭條日報》喺屯門市廣場首次舉辦「冬遊嘉年華2018」,有十八間旅行社參展,仲獲得泰國及台灣旅遊局嘅支持,期間有旅行社特別喺會場推折扣優惠,吸引市民一早到場揀選心儀嘅旅遊產品!同場《頭條日報》仲有遊戲區畀喺屯門市廣場消費嘅顧客玩遊戲,凡係參加遊戲嘅仲免費有爆谷或者棉花糖食,而答中問題仲有豐富禮品,禮品超過五千份,其中仲包括機票,真係好吸引!

  兩日嘅嘉年華舉行多場旅遊嘅分享會,有重量級嘉賓同大家分享俄羅斯、台灣、日本同郵輪旅遊嘅經驗,場場座無虛席。當中最令會場氣氛帶至高峰嘅,肯定係日本熊本縣嘅熊本熊Kumamon現身,誇張到有粉絲提早四個鐘到場等佢,就係為咗同熊本熊近距離接觸同selfie!小妹忍唔住係咁同可愛到爆嘅熊本熊自拍打卡,開心到呢。

Kelly Chu

hd