Executive日記——尖東海濱燈飾「放閃」勢成聖誕打卡熱點

        燈燈燈燈!做咩咁多燈?原來係為咗慶祝聖誕節,「閃爍尖東耀香江2018」亮燈喇!昨日傍晚尖東同海濱長廊一帶多幢大廈嘅外牆燈飾同步亮起,係咁放閃,勁靚、勁有節日氣氛,一定會成為今年聖誕嘅打卡勝地啫!

        由東尖沙咀地產發展商聯會主辦嘅第三十六屆「閃爍尖東耀香江2018」亮燈儀式,昨日喺尖東市政局百周年紀念花園舉行,今年嘅燈飾好靚,充滿驚喜,其中喺尖沙咀中心同帝國中心就裝上六萬五千顆變色LED圓點燈組成維港最大嘅多媒體幕牆,總面積超過四千平方米,向大家呈現極具動感及變化萬千嘅光影及圖案。而麼地道嘅三條天橋上會以禮物花裝飾,南洋中心外牆掛上以聖誕火車為主題嘅燈飾,千禧新世界香港酒店配以金光閃閃嘅「垂珠」,加上紅綠燈飾,非常璀璨,仲有好多靚靚燈飾,萬千燈火,照耀維港,數都數唔晒。

  大會請到署理政務司司長黃錦星、旅發局主席林建岳等嘉賓主持亮燈儀式。大會今年以「共融.關愛」做主題,透過璀璨嘅燈光,為大家增添正能量,希望大家好似尖東嘅燈飾咁發光發熱,將溫暖感染其他人。

  Kelly知大家一定好想一睹廬山真面目,不用心急,因為燈飾嘅亮燈時間會由昨晚開始至一九年一月一日,以及一月二十至二月十九日,而平安夜、聖誕節、元旦、農曆年三十同農曆年初一至年初四晚上亮燈時間仲會長啲,咁多時間,大家慢慢欣賞都得啦!

Kelly Chu


hd