Executive日記——各大商號乘機大賣廣告 「任何仁」 爆紅 被瘋狂抽水

        呢日網上最紅係邊個?唔使問,當然係同大家見面咗幾日嘅消防處吉祥物「任何仁」啦!唔單止網民like爆佢,各商號及品牌都乘機抽水,包括美心、吉野家、雙飛人等等,一時間「任何仁」嘅藍色調無處不在,佢自己都忍唔住話:「呢幾日太忙,想游個水鬆吓,但太平洋都被抽乾,點算!」

        任何仁紅爆網絡,被各大商號抽水賣廣告,美心發帖話「任何人都食晒」,而海報中嘅任何人就舉住清晒嘅碟喺度轉,標籤仲話:「任何人個肚腩仔應該就係咁嚟」;而吉野家嘅公關請人都請得特別有創意,話「招聘任何人」,打算請任何人過檔!雙飛人藥水更發帖將自己改名做「雙飛仁」,海報中嘅「雙飛仁」有「任何仁」個標誌肥嘟嘟肚腩,好得意!連本港足球隊傑志都話要炒咗佢哋原本嘅吉祥物「傑仔」,推出新吉祥物「任何鳥」喎,咁就任何鳥(人)都可以為傑志打氣啦!

  至於官方或志願團體亦抽埋一份,好似天文台吉祥物度天隊長變身「任何隊長」;紅十字會就post有個戴藍手套嘅人捐血,一望就知係「任何仁」啦。

  搞到「任何仁」都忍唔住話「呢幾日太忙想游個水鬆吓但太平洋都被抽乾點算」,計Kelly話呢啲係「愛之深,抽之切」呀。甚至好多人冒充「任何仁」開facebook專頁,Kelly提提大家,除咗消防處嗰個其他都係假㗎。

Kelly Chu

hd