Executive日記——公益金50歲生日分「金」同味 黎明大派「金幣」惹瘋搶

        昨日係香港公益金五十歲生日,喺中環皇后像廣場舉行分「金」同味慶祝儀式,取其諧音,大派朱古力「金」幣,多謝市民多年來嘅支持。現場星光熠熠,有公益金會長李業廣、名譽副會長黎明等名人出席。

  黎明着住緊身衫,身材fit爆,拎住裝咗朱古力金幣嘅籃繞場一周派畀圍觀市民,引到市民蜂擁而上,黎明即刻笑言:「測試人性!」佢之後登上開篷巴士,前往港九新界十八個地點繼續派「金」。

  Kelly知道公益金為咗大事慶祝五十歲生日,將會舉辦好多活動,例如昨日就喺會員機構逾一百二十六個服務點舉辦生日會,同受惠人士一齊慶祝;出年三月會舉辦「實踐.社創」創新策劃比賽;五月出版口述歷史書;仲有由黎明演唱、雷頌德重新編曲嘅主題曲《公益心》。咁就全港市民都可以一齊慶祝啦!

Kelly Chu


hd