Executive日記——女警港鐵站開槍 與警隊舊片情節相似

  一名女警日前執勤嗰陣,向持鎅刀企圖襲警嘅男子開槍。Kelly收到一條警隊用作槍械訓練嘅舊短片,發現內容情節竟同今次女警開槍幾乎一樣,莫非警隊早已「神預測」港鐵站會發生女警開槍事件?

  舊片中,警方正追緝一名身穿黑色西裝外套嘅男子,男警趕到大窩口地鐵站後,一名女警隨後跟上話:「師兄,電台派我嚟幫手。」男警輕蔑回話:「你呀!」然後二人到達月台,分頭行事。當男警發現疑犯,就立即上前警告:「先生,企喺度!唔好郁!」疑犯無理之餘,仲舉槍指住佢,突然「嘭」一聲。

  正當大家都以為男警中槍,原來開槍嘅係女警,佢用高八度嘅聲線向倒地嘅疑犯大喝:「警察!咪郁,放低支槍!」呢幕同今次女警喺地鐵站開槍情節相似,耐人尋味!

Kelly Chu


hd