Executive日記——勇奪兩金一銀一銅 港廚師燒賣入饌揚威烹飪世界盃

        香港廚師除咗煮中餐好掂之外,煮西餐都煮得有板有眼㗎!Kelly講緊香港廚師協會,會方派出香港代表隊出戰喺盧森堡舉行嘅二○一八年「烹飪世界盃」,憑出色嘅表現,以美味嘅食品,攻陷各國評判嘅味蕾,勇奪兩金一銀同一銅,今次真喺揚威海外喇!

        喺盧森堡舉行嘅國際大賽「烹飪世界盃」,吸引三十多個國家同地區嘅廚師代表參加,喺五日賽事中,分為個人比賽、國家/地區隊比賽同初級隊比賽。香港廚師喺創作同烹調西餐一向都唔遜色於歐美嘅廚師,結果喺國家/地區隊比賽中贏得一面金牌同一面銀牌,仲喺初級隊比賽拎到一面金牌同一面銅牌O添!

  其中香港初級廚師喺「自助餐設計比賽」,最刺激緊張,比賽長七小時,每個隊伍有五個鐘時間準備,評判會根據試食環節同餐飲服務進行評分。香港初級廚師嘅自助餐主題喺「魔法番茄廚房」,每道菜式用上嚟自唔同國家嘅番茄,亦有用到唔同口感、甜度、顏色嘅番茄。除此之外,香港隊伍仲將香港著名嘅「燒賣」放入菜單,希望畀世界各地嘅客人同評判品嚐。香港廚師協會話好滿意今次比賽嘅成績。

  賽事仲有段小插曲,搭飛機去盧森堡抵埗後先發現唔見咗一件行李,裏面有唔少廚具,令港隊遇上阻滯,小妹諗,如果唔係咁唔好彩,港隊可能贏多啲獎牌都未定。

Kelly Chu


hd