Executive日記——女士福利珠寶展覽 可以吸吓「珠光寶氣」!

        女士們有福喇!香港會議展覽中心由昨天起一連四日舉行「香港國際珠寶廠商展覽會暨購物節」,今年有全新展區「珠寶派對」,除咗吸收吓「珠光寶氣」,仲有機會將名貴珠寶帶返屋企!到時仲有「JMA國際珠寶設計比賽頒獎典禮暨30周年呈獻紀念特刊《珍飾鑲傳》新書發佈會」,啱晒有興趣了解珠寶設計嘅朋友!

        喺十一月二十九日至十二月二日期間,第二十六屆「香港國際珠寶廠商展覽會暨購物節」喺會展中心舉行。展覽有嚟自二十五個國家同地區嘅參展商,展位仲超過一千五百個O添!今年開咗個全新展區「珠寶派對」,展出唔同主題嘅派對珠寶首飾,亦有唔少設計華麗嘅打卡位,大家可以透過AR技術,同JMA國際珠寶設計比賽二○一八嘅入圍作品打卡留念。展覽中有好多嘢玩㗎!包括珍寶工作坊、可以扭出裝住名貴珠寶嘅巨型珠寶扭蛋機、AR奪寶遊戲等等,有機會贏得夢寐以求嘅名貴珠寶!而且為咗慶祝商會成立三十周年,現場仲設有「HKJMA 30周年慈善義賣」,收益扣除成本後會全數捐畀基督教靈實協會。

  同場加映「JMA國際珠寶設計比賽頒獎典禮暨30周年呈獻紀念特刊《珍飾鑲傳》新書發佈會」,歷屆嘅珠寶小姐會親身上台演繹今年以「綻放」為主題嘅得獎作品;特別出版嘅紀念書刊《珍飾鑲傳》記錄香港珠寶業嘅輝煌歷史,有興趣嘅朋友去展覽嘅慈善義賣攤位就可以買到喇!

Kelly Chu


hd