Executive日記——新聞博覽館開幕 人人做主播

        Kelly日日都睇新聞同聽電台節目,成日幻想自己做新聞主播,今次終於有機會喇!由街巿活化而成嘅香港新聞博覽館將會喺今個月五號開幕,除咗會介紹香港新聞業嘅歷史同發展,仲會有新聞體驗區,畀巿民親身體驗做主播報道新聞,Kelly真係好期待呀!

        香港新聞博覽館由中環必列啫士街街市活化而成,將會喺本月五日正式開幕,展館分為兩層,有十二個展區同兩個專題展覽,重現當年唔同報章嘅報道,仲會展出舊報紙、手稿、手畫圖表、新聞片段同舊新聞器材等嘅珍貴收藏品。兩個專題展覽嘅主題分別係四川汶川地震,同埋香港舉行嘅奧運馬術比賽。最「吸睛」嘅莫過於館內嘅一個大型互動投影幕,會展示由公眾揀選嘅香港十件新聞大事,包括六七暴動、六四事件、沙士爆發、佔領中環事件等等,一定可以勾起香港人好多共同回憶。除咗有好多展區睇之外,當然唔少得Kelly最期待嘅新聞體驗區啦!市民可以體驗做電視主播、喺綠幕前面讀稿、模擬新聞控制室嘅幕後製作,簡直係幫Kelly夢想成真呀!

  另外,博覽館亦有唔少「打卡位」畀公眾留影,例如報紙檔、舊街市攤檔、劏雞房、豬肉枱等等。新聞博覽館公關話畀Kelly知,O依家已經收到幾十個學校同社區團體嘅預約,本月將會率先安排團體參觀,最快本月底至一月初就會接受公眾預約參觀,有興趣嘅朋友仔記住留意喇!

Kelly Chu

hd