Executive日記————嘉許 「無名英雄」 搵軒仔做義工之星

        所謂好事成雙!今年係「義工運動」邁向二十周年,亦係社會福利署成立六十周年,政務司司長張建宗噚日出席咗社署主辦嘅「2018香港義工嘉許典禮」,話香港係一個好關愛嘅社會,希望可以藉住呢個機會多謝咁多位「無名英雄」呀!大會仲搵咗張敬軒做「2019義工之星」。

        身兼義工總領袖嘅政務司司長張建宗噚日話,社署推行「義工運動」二十年嚟,一直鼓勵市民參與義務工作。o依家全港登記成為義工嘅人數已經突破一百三十萬,「義工運動」嘅參與機構亦超過三千二百間,成績令人相當鼓舞!

  噚日嘅典禮由社署主辦,表揚義工對社會嘅貢獻,推廣關懷互助信息,攜手建立關愛社會。主禮嘉賓嚮典禮上嘉許上年唔同界別有傑出表現嘅義工,包括服務超過二十年嘅義工,同埋喺團體組別獲得最高服務時數獎嘅公眾團體等。

  另外,為咗慶祝「義工運動」二十周年,社署聯同香港電台製作咗一輯八集嘅實況劇集《義想天開》,通過改編唔同義工嘅真實經歷,向公眾推廣「人人做義工,生活不一樣」嘅信息。大會仲喺典禮上委任藝人張敬軒做「2019義工運動之星」,幫手推廣「義工運動」。咁有意義嘅事Kelly梗喺全力支持啦!Kelly已經登記咗做義工喇,一齊行動啦!

Kelly Chu

hd