Executive日記——漁農嘉年華尋本地味道 「復育」 成功 鶴藪白菜味濃爽口

  漁護署同業界舉辦嘅本地漁農美食迎春嘉年華,係Kelly尋找本土味道嘅好機會,最令人驚喜嘅係見到本地名種鶴藪白菜,佢經漁護署三年努力「復育」,重現市場,小妹試過,白菜味濃郁,真係好好味呀。

  本地漁農美食迎春嘉年華昨日起一連三日喺旺角花墟公園舉行,免費入場,小妹一早入場搵本地優質食材,全場嘅焦點係本地名種鶴藪白菜,點解咁多人搵?原來有段古仔,呢種菜喺六十年代好多產出,好受市民歡迎,點知隨着本港八、九十年代農業式微,鶴藪白菜散落各地,品種變得不純,逐漸消失市場,好彩經過漁護署三年嘅努力,復育成功。Kelly攞上手,發覺鶴藪白菜外形比一般白菜「矮腳」(即係菜梗短),纖維較少。漁護署農業主任陳益民向小妹介紹,稍加白灼就可食用,白菜味濃又爽口冇乜渣。

  另外,嘉年華展示本地水產養殖嘅技術,有本地養殖嘅珍珠貝同生蠔,由於用咗淨化技術,所培育出來的蠔隻特別乾淨,食得安心。今年漁農美食年華有超過三百九十個攤位展銷漁農產品,當中約兩百檔銷售本地漁農產品,係歷年之最,出售嘅產品包括有機蔬果及烏頭魚,亦設有各式各樣的節目,包括文娛表演、烹飪示範及互動遊戲,適合一家大小去玩番轉。

Kelly Chu


hd