Executive日記——南丫島文青新景點 新圖書館刻詩句散發書卷味

        Kelly周末去咗南丫島行番轉,呼吸一下新鮮空氣。闊別小島多年,發現喺榕樹灣碼頭附近嘅平房式圖書館已經拆咗喇,並重建成一座樓高三層嘅建築物,原來新嘅圖書館,外牆仲刻上宋朝思想家朱熹嘅詩句,好有書卷味。

小妹多年前遊南丫島,參觀過榕樹灣海邊一間公共圖書館,佢可能係全港最細嘅圖書館之一,平房式設計,非常簡樸,好有鄉村風味。但現在平房不見了,變成一座集圖書館同歷史文物館於一身嘅新型建築物,地下係南丫島嘅歷史文物室,將展出南丫島嘅出土文物、以前嘅家居用具、農具、漁具、考古發現同相等文物,而一、二樓就係圖書館,樓面面積增大至四百幾平方米,相信藏書會比以前更多,為島民帶來更多閱讀嘅樂趣。

  小妹知道呢座建築物嘅設計,係以「一本關於南丫島的書」為概念,外形看似多條長形木條或竹簡排列而成嘅書,外牆仲刻上宋朝思想家、詩人朱熹所著《觀書有感》詩句,「半畝方塘一鑑開、天光雲影共徘徊、問渠那得清如許、為有源頭活水來」,大意係「半畝大的方形池塘像一面鏡子一樣展現在眼前,天空的光彩和浮雲的影子都在鏡子中一起蕩漾。如果要問為何那方塘的水會這樣清澈呢?那是因為有那永不枯竭的源頭為它源源不斷地輸送活水啊。」夠晒書卷味,聽講新圖書館預計會喺今年第二季落成,Kelly諗緊到時約埋文青好友去睇書。



Kelly Chu

hd