Executive日記——特設防水妝品 女子專屬跑山賽 設「化妝專櫃」夠貼心

        Kelly身邊有唔少型男型女朋友熱愛跑步,強身健體,兼且可以瘦身O添,有朋友仲挑戰自己,去參加越野賽事。Kelly有好友上星期參加咗一個女子專屬嘅越野跑步比賽,佢話安排別開生面,居然喺起點同終點設「化妝專櫃」,幫女跑手扮靚靚,真係啱晒幾時都貪靚影靚相嘅女士們!

呢個女子專屬嘅越野山賽,上周六喺港島徑舉行,吸引一批女士參加,跑手們來自十五個國家,好似國際嘉年華咁,賽事分五十公里組同二十五公里組。大家都知道跑步會出一身汗,女士會擔心跑到「走晒樣」,大會就夠晒貼心啦!喺賽事起點同終點設立「化妝專櫃」,幫咁多位女跑手靚住咁參賽。每個「化妝專櫃」分別有至少三位化妝師,除咗提供一系列防水化妝品為跑手扮靚靚,仲有唔同圖案嘅紋身貼紙,大受貪靚嘅女跑手歡迎,認真貼心!

  除咗「化妝專櫃」,大會仲特別喺補給站花心思,準備咗女士們最愛嘅滋潤甜品,包括蜂蜜生薑茶、蜂蜜柚子茶、響螺蟲草花淮山薏仁雞湯、蓮子百合紅豆沙等等,Kelly真係估唔到喺跑步比賽都可以大享口福!呢個越野山賽由意大利一個戶外太陽眼鏡品牌贊助,真係夠晒創意!

Kelly Chu

hd