Executive日記——少年軍才藝多 耍拳奏樂瓣瓣掂

  香港青少年軍總會話咁快已經四周年喇!總會最近舉行咗周年晚會,仲請嚟特首林鄭月娥去為表現出色嘅團員打打氣。Kelly去睇過,發現原來好多青少年軍嘅團員都身懷絕技!除咗步操、耍拳得英明神武,仲精通中樂、西樂,充份展現青少年剛柔並濟嘅一面!

  香港青少年軍總會喺一月四日舉行周年晚會,仲特別邀請特首林鄭月娥、中央人民政府駐香港聯絡辦公室主任王志民、外交部駐港特派員公署特派員謝鋒等人出席。香港青少年軍總會主席陳振彬話俾Kelly知,最初青少年軍只係得幾十個團員,有賴各界四年嚟對總會嘅支持,依加已經有超過一千三百個團員喇!

  Kelly都有去晚會睇過,當晚大會頒發咗二○一八年度優秀團員等各個獎項。Kelly仲發現,原來好多團員都身懷絕技!一眾團員喺當晚表演軍體拳,舉手投足之間真係展現出軍人嘅風範!有幾個團員仲自己組隊夾Band,喺台上為大家表演中樂,仲彈埋結他O添,Kelly都估唔到原來佢哋連音樂都咁出色!

  另外,團員都喺晚會上,分享自己入青少年軍之後嘅成長歷程。佢哋講到,喺青少年軍不單止收穫咗友誼,亦喺訓練中磨練自己,學識承擔責任,仲參加咗好多服務社會,令基層家庭受惠。見到佢哋咁大成長,訓練再辛苦都好值得!

Kelly Chu

hd