Executive日記——會員同一時間只可提名一人 香港會收緊入會條件 等到提名人也過身

        位於中環嘅香港會(Hong Kong Club),入會一啲都唔容易,連特首林鄭月娥都話申請咗好耐、等到頸都長,先做到會員。Kelly聽一位老友講,近日情況仲誇張,事關香港會收緊咗提名規則,現在每名會員同一時間只可以提名一人,仲要等遴選有結果後至可以再提名。聽老友講,有一個申請人等了又等,竟然先後有兩個提名人過咗身,獲得第三次提名先至搞掂。

        香港會成立咗一百七十三年,一向係達官貴人嘅交際場所,想做會員,必須由會員介紹,以前每個會員提名不設限制,可以同時提名多於一名申請人,但最近收緊咗規則,每個會員同一時間只可提名一個新人,仲要等到遴選有結果,知道得唔得,會員先可以再提名第二人,咁會員提名機會受限制,搞到攞提名不容易,申請時間亦長咗。

  小妹有個好想入香港會嘅朋友,就有奇遇。佢話,透過一名會員推介申請入會,等了又等,等到提名,呢個會員過咗身!於是佢搵第二個會員提名佢,點知等下等下,佢又去咗世!好在朋友搵咗第三個會員推介,等咗一排,終於入到會,都算係屢敗屢戰嘞。

Kelly Chu


hd