Executive日記——迪士尼最新主題設施加入香港元素 Marvel迷準備好未? 三月同蟻俠黃蜂女大戰敵人

        各位Marvel迷久等啦!萬眾期待嘅迪士尼公園最新Marvel主題遊樂設施「蟻俠與黃蜂女:擊戰特攻!」,將於三月三十一日同大家見面!Kelly噚日去咗簡介會,原來佢係一個槍擊遊戲,大家可以跟住蟻俠同黃蜂女「縮小」,一齊對抗大敵人,設施仲有隱藏彩蛋等大家發掘!

        「蟻俠與黃蜂女:擊戰特攻!」係全球第一個以蟻俠同黃蜂女為主題嘅遊樂設施。華特迪士尼幻想工程創意監製戴司涵話畀Kelly知,呢個設施延續「鐵甲奇俠飛行之旅」嘅故事,邪惡組織唔單止入侵「香港史達大樓」,仲派機械蟲軍團入侵「神盾局科技館」,大家坐上「突擊」戰車,配備電磁脈衝槍,跟住蟻俠同黃蜂女一齊「縮小」,抵禦邪惡勢力!

  設施用咗先進嘅模擬情景技術,令大家好似親歷其景一樣!Marvel電影製作團隊仲特別為呢個設施,請嚟飾演蟻俠同黃蜂女嘅影星拍攝全新影片!華特迪士尼幻想工程高級創意總監湯傑斌話,呢兩位英雄風趣幽默,故事入面嘅對話會加入香港元素,佢仲賣個關子,話有好多個隱藏彩蛋,等各位Marvel迷嚟發掘!

Kelly Chu

hd